Rhy: 1.Teil

vo Hersberg nach Eschenz, Mai 2010

1. Tag, Sunntig, 24. Mai 2010 Hersberg – Kaisten

Nur ä viertel Stund Verspötig! 7.45 Uhr, Hersberg ab, alles drbi, hoffentlich. Im letschte Momänt no d`Satteldecki (numä grad d`Satteldecki, nid so wichtig… ;o)) gsuecht, und uf dr Kutsche (?) gfundä! Gepäck: d`“Wurscht“ hinde am Sattel mit Schloofsack, paar Ersatzchleider, Zahnbürsteli und Hundefuetter, käni 3kg, drzue ä Fotitäsche mit no Chliichram, am Sattel es Brämeölfläschli, ä Wasserfläsche (bitte nid verwächsle!) und ä Leine füre Hund. Vorne am Sattel ä Packtäsche mit 3kg Chraftfuetter für ä Monsieur, Putzzüg und Rägeschutz. S`Buuchtäschli mit allne chliine wichtige Sache (Notfallsache, Uuswiis, Gäld, Mässer) hani bi mir.Eusi Tour startet ganz unspektakulär, ohni winkendi Familie, ganz eläi. Über altbekannti Wäg gohts über d`Hööchene richtig Farnsburg und aabe uf Maisprach. Mir chöme guet vorwärts und galoppiere au mol no es Stückli. Trabe liggt wägem Gepäck nid drinn. S`Wätter zeigt sich vo sinere Schoggisite und momentan isch d`Temperatur au no agnähm. Bärguf, bärgab gohts untererä Hüenerbrugg (damit s`Fädervieh uf d`Weid cha, ohni überfahre z`wärde) dure uf Zuzgä und wieder uufe ufe Loobärg, wo mir ä fantastische Blick uf das hei, wo no vor eus liggt. S`Rhytal in sim ganze riesige Usmass! Und ich gseh jo vo do nur ä chliine Teil drvo! Das isch dr Momänt, wo n`ich mi frog, öb mir eus das würkli wei atue… ;o)Föteli gmacht (em Isard sini Ohre si druf, er drängt sich immer ins Bild!) gohts aabe uf Obermumpf und ufe Eikerbärg, wo mir in dr Mittagshitz (es isch mittlerwiile würkli warm, und mir si`s alli drei nid gwöhnt!) Pause möche. Pause bedütet: Dr Isard frisst, d`Babs passt uf dass er nid drvo latscht oder us Versehe Getreide statt Gras frisst und dr Benä liggt im Schatte und wartet uf eus. Nach öbbe einere Stund, em nä Gsprööch mitere Kelpie-Bsitzerin (“i ha scho mäng Hund gha, aber no nie sonä guetä wie dä!“), em nä Sunnebrand und ere allgemeine Pinkelpause stiige mr aabe nach Stei, wo mr denn ändlich ans Wasser chömä! Dr Benä findets natürlich toll, dr Isard isch weniger begeischteret…Total schön, so am Rhy noche, wenig Lüt und Hünd, Hammerwätter, super! Und unterwägs wärde mr tatsächlich vonere Touristin gfilmt! Schreeg!Nach es paar Kilometer chöme mr denn doch uf es ganz schmals Wägli, wo n`ich weder cha abstiige no umcherä… 10cm näbem Wäg platscht s`Wasser ans befestigte Ufer, was dr Isard sehr gföhrlich findet! Aber dr Farn uf dr rächte Siite isch no viel gföhrlicher, do riskiert mä doch lieber in Rhy z`gheie als vom nä sonä Farn gfrässe z`wärdä, oder?!
Mir hei`s aber gschafft, d`Lüt wo mr g`chrützt hei si bereitwillig uf d`Siite. Und denn isch jo wieder ä ganz ä schöns Stück Wäg cho.
Bis…Zum Riitverbot simmer an däm Tag doch au no cho, ufem Umwäg hei mr ä Grillstell mit Tisch und so gseh zum raschte. I ha s`Rössli zerscht loh frässe, spöter an ä Baum bunde, bi ufs Bänkli gläge und iigschloofe… fascht… wenn Monsieur nid immer genau denn g`wieheret hätti! Nachem dritte Mol hani s`Schloofä ufgeh, und wo denn no zwoi Velofahrer näbedra ghockt si, ischs mit dr Rueh sowieso verbii gsi.Mir si wiiterhin so guet vorwärts cho, dass mr scho früeh in Kaisten gsi si, wo n`ich denn no ä super Beiz gfunde ha und mir es sehr guets Sandwich übercho hei. Ufem Wäg ufe Heubärg hämmer das denn teilt (dr Isard und ich s`Brot, dr Ben dr Schinggä). Allerdings, bim Wägwiiser richtig Rütihof hani denn glich dänkt mir chönnte, will mr so früe dra si, no öbbis go ässe… Je wiiter mr uufe cho si, desto schöner isch d`Ussicht wordä, d`Hügel. dr Rhy, d`Oobesunnä… Hammer. Dr Isard het denn sogar gwartet, so dass ich ha chönne Föteli mache! S`het sich denn usegstellt, dass s`Restaurant und mini Übernachtig ufem gliiche Hof si, was natürlich super passt het. Dr Isard het ufe Weid dörfe, het Wasser, Salz und Silage (!) übercho, und ich ha no lang mitem Buur gschwätzt, ä ältere Maa, Vollbluetrösseler, wo Isländer züchtet. Ui, wenn d`Sonja das wüsst…!
Nacheme guete Znacht in ä biz komischer Atmosphäre si dr Benä und ich denn in euses “Zimmer“ go schloofä. Priis-Leischtig scho fascht z`billig für die liebevolli Versorgig vom Ross!



2. Tag, Mentig, 25. Mai 2010 Kaisten – Fisibach

Vom Heubärg wäg chamä über superschöni Graswäg hindä abä richtig Rheinsulz. Dr Herr Gisler het mr erklärt wo dure, aber i ha nid ufpasst und bi promt am falsche (am total extrem falsche!) Waldrand glandet. Aso simmer halt mol retour. Ändlich ufem richtige Wäg isch`s denn super guet gloffä, abgseh drvo dass es im Aargau alwä keini Robidog z`geh schiint! Vom Heubärg hani meh als ä Stund es Hundesäckli mitgschleppt, dur zwei riesigi Wälder und zwei Dörfer! In Etzgen hani denn bi dr Bushaltstell ändlich sonä minimalistisch chliinä Mischtchübel gfundä! Aber dr Herr Ben weiss natürlich nüt gschiiders als zwei Stroose wiiter vor dä Auge vom nä Awohner: Zmitzt uf d`Stroos z`schisse! Sonä doofä Hund!I ha denn dä Typ zerscht gfrogt, öbs bi im Aargau überhaupt Robidog git, bevor i s ufgläse ha! Wie nä Tourischt! Unmöglich!Wieder in dr Nöchi vom Rhy hani ä härzigi Pizzeria entdeckt, es isch erscht 11i gsi, und i ha eher so öbbis Sandwich- oder äfach Brötli-mässigs gsuecht, ha denn aber ä Salat mit Pizzabrötli (es ganzes Chörbli voll supergueti, no warmi, äxtra-für-mi-gmachti Pizzabrötli) übercho… unglaublich guet, egal zu welere Tagesziit ;o) Dr Isard isch unterdesse näbe Occasion-Autos ufeme deckte Chiesplatz gstande, und het natürlich au no öbbis müese ligge loh! Spöter het`s au für ihn no öbbis z`frässe geh, leider an dr pralle Sunnä, was füre Bene und für mi (Sunnebrand uf dä Unterärm! Hallo?!) nid so zueträglich gsi isch. Am Rhy het is denn s`Glück ächli verloh: Vo wiitem scho het mä s`AKW gseh, aber bis mir mol dört gsi si! Unterwägs hani mitem Monsieur no müese übere Bahnunterfüehrig diskutiere, sone chliini für Fuessgänger mitere Stäge. Abe isch denn mol ändlich gange, uf dr andere Siite ufe het er nüt gschiiders gwüsst, als uf dere schreegä Flächi für d`Velo z`laufe, isch natürlich grütscht, uf d`Chnü gheit und jo. Aber isch nüt kaputt gangä. Usser es paar Närve vo mir. Aber die si sich das jo gwöhnt 🙂
Bis uf Zurzach isch`s nid besser wordä… überall Riitverbot, uswiiche, Wäg sueche, Koblenz umfahre… Mir si nid vom Fläck cho, s`isch mega heiss gsi, dr Isard het fascht schlapp gmacht, und bim Benä hani au chli Angscht gha dass er mr kollabiert…!Nach Zurzach hei mr no schnäll in Rhy chönne, dr Ben go schwimmä und dr Isard go plansche (und natürlich go dri schisse), so das mr schlussändlich alli pflotschnass, aber wieder chli abgchüelt und so au chli zfriedener witer gloffä si. Vo dört bis uf Rümikon bini denn gloffä und ha s`Rössli über Stock und Stei mitgschleift. Ä total schönä Wäg em Rhy noche, wie mä sich`s wünscht, nid zu müesahm, aber au nid grad aaspruchslos.Überä letschte Hübel uf Fisibach, simmer um die 7ni ändlich ufem Hasenhof acho, wo d`Claudia scho gar nüm mit eus g`rächnet het (falsches Datum, oops!). Es het ä früsch g`chlaute Salat und öbbis vom Grill zum Znacht geh.
Es isch denn au no ä Elsässer drzue cho, wo mitem Velo em Rhy noch abeszue gfahre n`isch. Uf jede Fall isch das ä ganz ä gemütliche Oobe mit dene Lüt gsi! Dr Isard het ä Box mit Uslauf (und Plastig-Streifä-Vorhang) gha, het aber zobe und am Morgä no uf d`Weid dörfä. Absolut genial!



3. Tag, Zischtig, 26. Mai 2010 Fisibach – Marthalen

Am Morge isch dr Isard scho nüm so begeischteret gsi vo dr Weid, aber natürlich het er jo no sis mitgschleppte Chraftfuetter übercho… Nachemä Zmorgä wie im Hotel (inklusive Nutella, hmmm!), plus Sandwich für unterwägs ischs scho 9i gsi, bis mir wieder furt gsi si. Und dä Tag het grad nid so super agfangä: 200m vom Hof wäg, nid ufpasst, Zügel abegheit, drufgstande, g`chlöpft: Läderriemli kaputt, und vorallem s`Vorderteil vom Zügel het`s irgendwo ane furt g`spickt, das hani nüm gfundä 🙁 So blöd, ha mi grad chli gnärvt, und afo Pros und Kontras vo offene und zuenige Zügel abwäge…! Ha ufgeh. Ha in däm härzige Kaiserstuhl no müese Föteli mache und denn hei mr is s`erschte Mol müese dur sone Fuessgänger-Barrikade zwängä: Es isch kei Riitverbot, aber es het so Holzdurchgäng wo n`es (dünns) Ross grad durechunnt, wenn vorne und hindedra grad Platz isch, aber wenn nid… Jä nu, vorläufig simmer ufem Wägli und das isch au no rächt schön gsi, abgseh vo all dene Raupe und Chäfer, wo mir wieder gsammlet hei… Die negscht Barrikade hämmer denn mehr oder weniger elegant grad es Hübeli duruf müese, zums umgoh…Nach Tössriederen (das chönnt am Ändi vo dr Wält si!) hämmer wieder uf mä schöne Wäg guet chönne vorwärts goh, bis in d`Tössegg. Sonä unglaublich schöni Gegend, mit so suuberem Wasser, das mä ufe Bode gseht… Superschön! Mir si wägere Umleitig ä Hang abe g`rütscht (dr Isard chunnt fang einigermasse bereitwillig mit ;o)) und uf mä sauschöne Wägli (Rhy-Uferwäg halt, und Biberpfad) glandet, wo eus bis nach Berg am Irchel brocht het. Es isch ä spannends Wägli gsi, mit extrem schöner Ussicht, meischtens sehr sicher und mit Stäge und Brüggli, aber es isch soo lang gsi! Mir si froh gsi denn bi däm Dorf chönne Mittagspause mache und verschnuufä. Dr Isard het sälber aständig gfrässe, so dass ich ha chönne zum Ben in Schatte sitze.Bi dr Thur-Mündig wärs zwar au sehr schön, aber will sie dört grad alli Wäg neu mache, und alti Wasserläuf wieder ufbräche, chamä eigentlich niene durä. Müehsam. Aber ebe, die schöne Stück entschädige immer wieder für söttigi Sache. Ufere Wiese hani no ä Hund gseh, s`hät chönne dr Soggä si, dä het würklich genau glich usgseh! I ha denn es paar Wort mit dere Frau gschwätzt, aber will die dört oben-ohne am sünnele gsi isch, isch das irgenwie ä biz ä komischs Gspröch gsi ;o)Ä schöni, gmäiti Matte zum galoppiere (allerdings mues mä Monsieur mit viel Druck überzüge), Aue, Liechtwald-Landschaftä und Örtli wie zum Bischpiil Ellikon si unglaublich schön, und mache sone Trip zu däm was er isch: Eifach umwärfend schön! Au dr “Umwäg“ über d`Halbinsle Rheinau het sich definitiv g`lohnt, obwohl`s sehr verwirrend isch, dr Rhy plötzlich uf allne Siite z`ha…Ufem räschtliche Wäg bis uf Marthale hani no es paar “do-chunnt`s-mr-bekannt-vor“-Ort gseh, und bi denn schliesslich trotz emä Umwäg und emnä fehlendä Brüggli zunere normale Ziit bi Ochsners acho.Bim Znacht hani mi definitiv überässe, aber es isch so super guet gsi! Und denn au no Glace mit heissä Beeri zum Dessert, hmmm!
In dr riesige Box hani s`Stroh denn uf d`Hälfti vo dr Flächi gschuuflet, sälbst dört hätte no zwei Ross platz gha ;o)



4. Tag, Mittwoch, 27. Mai 2010 Marthalen – Eschenz

Au z`Marthalen het`s es super Zmorgä geh, mit Zöpfli, Ei, Müesli, Chees… Hmmm! Am Morgä hani denn au no d`Frau Ochsner troffä und sie het mi fascht nüm wäg gloh ;o)Drum isch`s an mim letschte Tag no chli spöter wordä mitem Ufbruch, aber mir hei jo niene meh ane müese an däm Tag, und heis jo chönne locker neh. Trotz em guete Zmorgä hani z`Marthale im Dorf nid chönne widerstoh und bi in dr Bäckerei go nes Schoggiweggli hole für unterwägs. Schliesslich weiss mä nie was es Zmittag git, öbs überhaupt öbbis git ;o)Es isch ä ganz ä härzigs Dörfli, mit dene alte Riegelbaute mit dä rotä Bälkä und dä vielä Blueme vorusse. Und au d`Landschaft zringsum isch schön. I bi es Stück uf dr gliiche Route gsi wie letscht Herbscht mitem Peter und dr Pat. I bi aber grad diräkt wieder an Rhy, an Dachsen verbii und bi dr Rhybrugg z`Nohl no schnäll ins Wasser go planschä. Und denn hei mr is dure Touriste-Tumult bim Rhyfall müese schloh. Dasmol vo oobe, isch es scho wahnsinnig iidrücklich, das Wasserspektakel! Und d`Lüt hei eus aagluegt!!! Unglaublich 🙂 Mir si zerscht wieder ufe schöne breite Velowäg cho, denn, bi Flurlingen und Feuerthalen hei mr viel durs Quartier und uf Stroose müese uswiiche, was natürlich nid so wältbewegend gsi isch…Nach mä Abstächer an Wald hei mr – wiedermol am nä ehemalige Chloster verbii – ans Wasser chönne, ä total schöne Abschnitt, und kei Mensch umä. Au z`Diessenhofen, dur es Chloster, ächli dur`s “Städtli“ und denn leider uf d`Hauptstroos, will ä Awohner gfundä het (empört gfunde het!) ich chöni dört nid durä! Die negscht Möglichkeit für an “euse“ Fluss het sich als nid vorhande entpuppt, und wo mr gliich no abecho si, chunnt is sone Mini-Transport-Raupe-Fahrzüg entgege… Super, uf mä 1.5m breite “Wäg“, wo`s linggs 2m abwärts in Rhy goht! Dä het denn aber scho wiit vorne ä Lucke gfunde, aghalte, abgstellt und gwartet bis mir dure gsi si. So lieb!Das Wägli isch würkli uf dr Uferbefeschtigung gsi, aber total schön. Über ä Zältplatz (nur Leinezwang, erstuunlicherwiis wit und breit keis Riitverbot, trotz em gschnieglete Rase) simmer über Rheinklingen uf Wagenhausen cho, wo mir euses “Ziel“, d`Brugg z`Stei, scho gseh hei!
Nach Stei hämmer es erschts und letschts Mol in See (!) chöne go plansche und abchüele, bevor mir uf Obereschenz cho si, woni euses “Taxi“ anebstellt ha.
Dört het dr Isard bim nä Huus no Rüebli übercho, vo dä Chinder vom nä Dütsche, wo mi dört no chli usgfrogt het. So härzig!

Nachemä letschte Blick ufe See, und somit uf eusä wiiterä Wäg, simmer mit Auto und Hänger wieder richtig Weste gfahre…