Jura 2012

Samschtig, 11. bis Sunntig 12. Februar 2012.

“Ab in Sattel und dr Winter im Jura no so richtig gniesse!“
Das ischs Motto vom Wucheend-Trip gsi.
Es isch au richtig Winter gsi und richtig chalt. Das hend die meischte gfunde wo mit cho sind, s het aber au Usnahme ge. 🙂
Aber vo vorne:-)
Nach ere bitz turbulente Fahrt mit dr Maya, sind mir vier den au in Les Emibois acho. Leider bin i Ahängerfahre nonig so gwohnt, und das erst no bi Schnee uf dr Stross. HILFE! Doch zum Glück isch uns dr Peter nach eme Telefon cho hole und het de Rest vo de Strecki ufe nach Les Emibois übernoh. S Auto vom Peter het d Denise zrugg gfahre.(()) Bi i froh gsi. Nomol Merci vielmol. 🙂 Und so sind mir vier am nüni Zobe au an unserem Ziel acho.:-)

Mitcho sind, Denise mit ihrem Franzos, dr Peter mit sim Isykk-Kul, Regula mit ihrne zwei Freiberger, Maya mit dr Presja und ich (Phoebe) mit minere Girl. Wo mr am Samschtig morge los gritte sind, si mr so warm ipackt gsi, dass me vom Bode us nüm ufs Ross cho isch! S Wetter isch mässig guet gsi, es isch bewölkt gsi und het ab und zue au chli gschneit. Am schlimmschte isch aber dr Wind gsi. Wege ihm het me nit so richtig chönne d Landschaft gniesse, wills eim am wöhlschte gsi isch, wenn me eifach nur abe luegt und so wenig wie möglich wenig d‘Bise im Gsicht gspürt het.
Nach 2 ½ Stund hend mir es super Fondue becho. MMMMMMHHHHHHHH J Das het so was vo guet do und motiviert wieder in die Chälti use zgo. Uf em Rückweg isch es den nüm so schlimm gsi, will mir dr Wind im Rucke ka hend. Do het me grad e stund meh chönnte go… Miteme tolle Nachtesse hämr mitenand de Obe gmüetlich usklinge lo. 🙂

Am Sunntig wo mr ufgstande sind hend mir chum unserne Auge glaubt; s`schönschte Wetter! Chalt isch es trotzdem no gsi, aber will d Sunne gschine het, het me das gar nüm so gspürt. Nacheme tolle Zmorge isch es denn ufs Ross gange und ab wieder in Tiefschnee. Nach öpe 2 Stund ritte sind mir im Restaurant acho. Nachem verpflege vo de Ross, hets denn für uns au scho wieder was zum bisse ge. Barbara, wo suscht ame au dr bi isch, leider das Johr wegere Chnü-OP nit het chönne mitcho, isch uns bi unserer Mittagsrascht cho bsueche.
So, nach dere Stärckig wieder alli in Sattel und ab gohts uf dr Heiweg. Chuum zrugg hend d`Ross ihres z’Vieri becho(und d Ritter natürlich au). Und den hend sich alli au wieder uf de Weg richtig hei gmacht.
So schnell gohts und es schöns, tolls Weekend im Schnee isch wieder verbi. Es isch eifach super gsi so durch die verschneiti Landschaft vom Jura dure z`strieche.
Hoffentlich nöchscht Johr au wieder. 🙂

Phoebe