Bennwil 2009
Samschtig, 29. bis Sunntig 30. August 2009
Ändlich mol hei d`Phoebe und ich wellä eusi Iiladig bi dr Petra ilösä: Die het eus nämlich scho lang zum Grilliere in ihrem Garte z`Bämbel iiglade! Und do s`Vocks nüm so lang uf däm Hof obe wohne, hämmer das bald mol müese mache!
So simmer also Ändi August, bi super schönem Wätter mitem Isard und dr Girl gstartet. Zerscht Richtig „Ütigä“, Sissach (no an Postomat go Gäld holä und denn dure Strich-Code), über Thürnä und alles obedure uf Diegte und schliesslich uf Bämbel. Wäge verlorenem Gepäck, und will mir immer wieder Sache gsehn, wo mr chönne drüber stuune, simmer viel z`spot bi dr Petra acho, aber mir hei trotzdäm no öbbis z`Ässe übercho 😉 D`Ross hei uf ä riesigi, fetti Weid dörfä und mir si mit Würscht vom Grill versorgt wordä. So guet! G`ässe hei mr allerdings dinne, wills duss gras ä biz ungemütlich chalt wordä n`isch! Übernachtet hei mr im Stroh im Rossstall näbedra. Dunkel wie inere Chue inne, aber isch scho guet gsi.
Am Morgä simmer denn drfür wieder fascht verfrore. Super schön klar und dämentsprächend chalt! No bi Morgegraue simmer los g`ritte, zum Wieseli abe, wo mr no dr Patrouillen-Ritt mitgmacht hei. Nid speziell erfolgriich, aber isch sehr luschtig gsi 🙂
Bi immerno wunderschönem Wätter hei mr is denn am Nomitag ufe Heiwäg gmacht, und si doch froh gsi, wo mr wieder mit allem Gepäck acho si.
