Rhy: 2.Teil

vo Eschenz nach Walenstadt, September 2010

1. Tag, Samschtig, 4. September 2010 Eschenz – Neuwilen

Z`Eschenz hei mir würklich genau dört s`Ross usglade, wo mr`s im Früelig iiglade hei. Denn si mini Eltere mitem Spooks no es Stückli mitgloffä, bis zum erschtä Bänkli. Dört hei si bi strahlendem Sunneschiin die schöni Ussicht ufe Bodesee gnossä, und ich ha mi ufä Wäg gmacht. Zerscht bärguf, am nä (nid so speziellä) Schlössli verbii, überä Hof mit Säu (ui, gföhrlich!) und alles obeduurä über Liebefels… Natürlich immer mit Blick ufe Bodesee, was scho biz beängstigend gsi isch. Gseht us wie s`Meer… So ändlos ;o)
S`negschtä Wägstück isch vielversprächend gsi, ä langs Stück em Hang entlang, Trampelpfad, optimal für eus! Aber schlussändlich, nach öbbe zwei Stund, isch mr das ganze denn doch ächli verleidet… Zerscht simmer an es kaputts Brüggli cho, zwei Baumstämm, Brätter drüber, und: in dr Mitti es Loch! Das het mr jo nätterwiis grad Uskunft uüberä Gsamt-Zuestand geh, aber näbedure isch grad au nid gangä, will das Bächli sehr ä steils Bachbett gha het. Mir si also es Stück dr Hübel ab, quer durä Wald wo voll gsi isch mit Totholz und Äst. Ändlich ä Stell gfundä, isch dr Isard abegrütscht, het in dr Hälfti ä Gump überä gnoh, isch uf dä Chnü glandet und irgendwie ufe gchlätteret… I bi fascht nüm us däm Bächli usecho, will d`Ärde am Hang so locker gsi isch und i immer wieder abgrütscht bi. Eimol am andere Ufer simmer aber no lang nid wieder ufem Wäg gsi, dä hämmer zerscht mol dur`s Chrüsimüsi us Äst, Stämm und Hügel müese finde! So öbbis isch mr ächt no nie passiert, aber dr`Isard het sich super gschlage! Spöter hei mr nomol es nid-so-chräftigs Brüggli verwütscht, dört hätti s`Ross dure Bach chöne. Will i aber kei Luscht gha ha uf nassi Füess, bin ich über s`Brüggli. Dr Monsieur isch aber nid ans andere Ufer cho, sondern bachufwärts gloffä. Natürlich isch dr Zügel abegheit und dr Isard isch wie nä Ölgötz im Wasser gstande und nid cho! I ha nä müese holä. Het allerdings klappt, inklusive troche bliibä. Woni gmeint ha mir heige ändlich nur no grossi Wäg, simmer doch no uf es Stück Waldwäg grotä, wo äfach vom Holzä nid ufgruumt gsi isch… So dass i an einere Stell ha müese uf ä Ast stoh, und dr Isard eläi het müese drüber laufe. Het er nid begriffä. Und wo n`er denn ändlich gloffä n`isch, het er nochär nüm gwartet! Mensch!
So simmer bis zobe grad nochli in Stress cho, trotz dä schönä Stück, wo mr hei chönne vorwärts ritte, und au mol galoppiere.
Und immer wieder het mä super schön dr Bodesee gseh. Igendwie au frustrierend…
Im letschte Wald hei is denn no Unmänge vo Mini-Müggli attackiert, extrem müehsam! Während em Laufe isch`s grad no gange, aber wehe mir hei mol aghalte…!
Wo mr in Neuwilen acho si, hani s`Gfühl gha es bisst mi überall, und vor luter Müggli hei mr au no ä Umwäg gmacht. Aber denn, acho bi dr Karin, si d`Strapaze vom Tag schnäll vergässe gsi: D`Karin und dr Koni hei es alts Buurehuus umbaut, ä tollä Offestall für ihri zwei Andalusier gmacht und alles ganz toll iigrichtet und dekoriert. So schöön! Es isch grad no ä Pilger-Wanderer acho, und d`Karin het eus es super guets Znacht g`chocht. Mit Chueche zum Dessert, das isch ächt herrlich gsi, wie Ferie halt ;o)
Em Isard (er het d`Hälfti vom Offestall übercho, mit Weid, Chraftfuetter und allem) hets au gfallä, er hät glaub nüt drgegä gha dört z`bliibä…

2. Tag, Sunntig, 5. September 2010 Neuwilen – Häggenschwil

Nachere super bequemä Nacht mit wunderbar-schloofä, hei mir eus, nachemä härzliche Abschied vo Kellers, wieder ufä Wäg gmacht. Ufe Tipp vo dr Karin bini diräkt zu dä Bommer Weiher, so öbbis schöns! Es isch sone richtig super schöne Tag gsi, Sunneschiin, chuum es Wölkli aber glich nid z`heiss. Mir si guet vorwärts cho und hei nachem Mittag am nä Waldrand wellle Pause mache. Chum het aber dr Isard afo frässe, isch es Araber Stüetli, oder besser gseit es het ebe nid welle umä Egge cho, wo`s eus gseh het…! Sie isch denn ganz gstresst näbedure trabt, und ihre Riiter het sä chuum chönne hebä! Aber chuum isch sie denn wäg gsi, het Monsieur nüm chönne frässe! Dr Herr Isard du Ruet isch nur no dört im Gras gstande und het dere Stuete noche glotzt!!! Nicht ansprechbar! Unglaublich! Mir hei also würklich wiiter müese, und ä neue Frässplatz sueche, und mir hei Glück gha: In eim vo dene wunderschöne Wälder hei mr ufere Liechtig mit mä Hüttli druf dr perfekti Platz gfundä: Hinter em Hüttli isch Gras gwachse , so dass i dr Isard ha chönne frässe loh währenddäm ich näbedra gschriebe ha. Er isch denn zu mir zum Bänkli cho und het afo döse. Also han ich sogar chöne es churzes Mittags-Schlööfli mache, und d`Jungs si ganz aständig näbedra bliebe!
Bim negschte Hof hei mr mitere Büürin gschwätzt, wo grad ihri Chüe vo dr Weid gholt het, und in Fälwies het mr ä alte Buur no paar Öpfel gschänkt (“kenne Sie Gravesteiner? Näme Sie nume!“) Mir hei also grad schnäll ä Öpfelparty gfiirt, isch allerdings ä blödi Idee gsi… Dr Isard frisst (ohni Gebiss!) sooo gruusig, dass dr halb Öpfel in Form vo Schuum wieder vorne use chunnt und denn nid äfach so am Bode, nei, er sprützt das Züg überall ane! Und alles chläbt, so gruusig! Mach i nie meh! Vorallem wenn i die gliiche Hose no 4 Tag sött alegge… Zum d`Händ wäsche, und füre Durscht, simmer ins negschte Dorf ine gritte (Muola) und hei ä Brunne gsuecht. Die sie in dere Gegend eher rar, aber mr hei eine gfundä. S`hei alli Durscht gha, und i ha dr Benä zuesätzlich no ganz nass gmacht, zum abchüele. Er isch ämel nochär besser gloffä. S`letschte Stück simmer nomol über chlini Wägli, dasmol einigermasse guet begehbari. Mir hei nomol ä Frässpause iigleit und i ha nochli chönne schriebe. Usser em nä Stacheldroht (woni ha chöne ufmachä) und em nä gülleretä Fäld (wo mi Wäg hät söllä si) isch is nüt meh drzwüsche cho und mr si pünktlich ufem Wetzenberg acho.
Ä riese Hof! Ä älteri Frau isch uf mi zue cho, d`Frau Eisenhut, und het mr scho alles zeigt. Dr Isard het ä Box becho, näberä zickige Stuete (also wie dähäi) und ich es Sofa im nie fertiggstelltä Riiterstübli. Und ä Duschi und Chraftfuetter. Ufem Wäg zu mim Schloofplatz hani sä denn gseh: 5 grossi, schöni Kutschä, 2 toll zwäggmachti Landauer und Breaks, und inere andere Schüüre, Marathonwäge und Gsellschaftswäge! Wahnsinn! Und natürlich überall Flots und Plakette. Ganz nüchtern hei drgegä d`Ross usgseh… Mä cha sich fascht nid vorstelle, dass die vier mol sone edels Gfährt zoge hei! I ha mit Iisehuets chönne Znacht ässe, ä deftige Toast Hawai mit Spiegelei und denn no Zwätschgechueche! S`Iisehuets si au so richtigi Pferde-Mensche, no lang hei sie verzellt, vo dä Gepflogeheite im Fahrsport, vo dä Fahrer, ihrne Eigeheite, ihrne Erfolg und – ihrne Fraue ;o) Herrlich!
Schaad dass es sowiit wäg isch, süscht hät i mir dr Kutsche mol verbii chönne…

3. Tag, Mentig, 6. September 2010 Häggenschwil – Thal

Am Morge hätt i au no Zmorgä übercho, aber das chunnt bi mir amä nid so guet, mit ritte nochär… Am 20 vor 9i bini wieder wiiter, durs Dorf, woni im Lädeli grad no Brötli für Zmittag ha chönne chaufe. Usem Dorf use, isch`s denn scho mol langsam dr Bärg uf gange, und dört wieder: ä super Uussicht ufä Bodesee und s`ganze Umland, inklusive mi bishärigi Wäg. Langsam isch es denn hügelig wordä, so chli Appizäll-mässig. Und vor eus het sich scho dr Rohrschacherbärg uftürmt, wo mr hei drüber müese. Bevor`s aber richtig bärguf gange n`isch, hei mr no dur es Tobel abe müese, und über d`Steinach. Dr Isard isch wieder meh g`rütscht als gloffä, will Monsieur jo lieber näbe dr Stäge lauft, als druffä! Aber super schön, die Steinach: sone richtigs Mini-Wildbächli imnä schluchtähnliche Tal. Es het es Metallbrüggli gha, was i amä nid so toll find, drum simmer dure Bach, was au problemlos gange n`isch. Äne ufe isch scho chli müehsahmer gsi, s`het aber spöter au ä total schönä Wäg gha. Halt äfach chüel, wie`s in so Schluchte halt isch. S`negschte Dorf isch ufere “Hoch“-Ebeni gsi, und denn isch`s nomol in es Tobel abe gange, dasmol über d`Goldach. Dört unde am Bach häts ä wunderschöns Lagerplätzli gha, mitere “natürliche Weid“ mit dur eim Trampel-Usgang und superschönem Gras! Das isch ä Momänt guet gange, solang bis dr Bene gschlofä, ich mis Brötli uspackt, aneghockt bi und afo ässe ha. Und denn het Monsieur beschlossä, er müesi jetz goh. Und zwar sofort! Am Wäg vorne het er denn wieder gwartet. I has nomol probiert, bi nomol em Ross noche g`rennt und ha`s denn ufgeh… Drum simmer halt wiiter. Sonä Mischt! Äne dr Bärg uf, isch`s immer wiiter gstiegä, und s`het so härzigi Appezöllischi Höfli gha. Herrlich schön! Aber aasträngend. Dr ganz Räschte isch alles no bärgab gange, und i bi alles gloffä. Z`Thal, zmitzt in dr Ebeni stoht ä Hübel, gseht us wie ufgschüttet, äxtra zum Rääbe abaue, schiint mega künstlich! Dört drhinter isch mi Übernachtigsplatz gsi, und will i no Ziit, nüt z`Ässe und Luscht uf die schöni Uussicht gha ha, simmer no uf dä Buechbärg ufe gchniempet. D`Beiz dört obe het allerdings am Mentig Ruhetag, und so hani mi denn no an dr Coop-Tankstell (so dermasse blöd bini scho lang nüm agluegt wordä! Obwohl`s ä schöns Mätteli mit Bäum druf gha het, zum s`Ross abinde) mit emnä Notvorrot (Schoggi ;o)) und Hundefuetter versorgt. Pünktlich bini denn mit mine Jungs und em nä zuesätzliche, unterwägs ufgläsene Hund bi Waldburgers acho.
Dr Andreas het sich sofort umä Isard kümmeret, wo zu sim Freiberger uf die grossi Weid het dörfä. Sonä hübsches Tier, dr Corso, het chli usgseh wie dr Max won ich druf ritte glehrt ha :o )
Em Andreas si Vater, dr Ernst, het mi denn au no grad zum Znacht iiglade, ä richtige St.Galler Bratwurscht mit Röschti und Salat! Das isch doch diräkt ä wärtvolli, kulturelli Wiiterbildig, oder? Isch uf jede Fall super guet gsi, (isch scho anderscht als sonä “normali“ Brotwurscht bi eus, und wird in St.Galle würklich ohni Sänf g`ässe!) Zum Dessert het`s denn au no Himbeeri mit Rahm geh, hmmm!
Schloofä hani im Eizimmer-Studio chönne, wo die beide Manne im Parterre vom Eifamiliehüüsli iigrichtet hei. Super Sach, mit Blick uf d`Ross! Dr Andreas het mit em Corso s`Militär gmacht, aber jetz isch dä au scho 19i und militärisch pensioniert. Zuesätzlich flitzt zwüsche Stall und Huus no ä Shetty-Dame ume. Iisperrä unmöglich, sie haut immer ab! Aber nid wiit, und chunnt jo immer wieder zrugg.

4. Tag, Zischtig, 7. September 2010 Thal – Montlingen

Zum Zmorgä het`s Gipfeli (!) und es 3-Minute-Ei (!) geh, Wahnsinn! Das isch voll dr Luxus gsi, wohrschiinlich bini nach dä Ferie wieder es paar Kilo schwerer, und dr Isard wieder liichter… :-( Dr Andreas het nä sofort mit Maiswürfel welle uf-füetterä, aber… Monsieur het`s nid gfrässe (ha!) Hafer isch denn doch besser gsi ;o)
S`erschte Mol uf mine Toure isch mi Gastgäber am Morge es Stück mit mir mit g`ritte. Das isch eigentlich voll gemütlich, nur dr Isard isch nachere Stund langsam grantig wordä, will em s`Tempo z`langsam gsi isch :o ) Aber ganz cool, dass mr dr Andreas dr Wäg em Damm entlang zeigt het, dr “Katastrophä-Wäg“ wo bi Hochwasser immer wieder überschwemmt, und mit Sand ufgfüllt wird. Näbedra hets au ä Wiese, wo mä, wenns nid z`nass isch, Kilometerwiit galoppiere chönnt…
Au nachem “Wätter-Eck“ isch`s no troche bliebä, und z`Au het dr Andreas mit em Corso umgchert und isch wieder richtig hei. Mir hei gli no ä churzi Fräss-Pause gmacht, und obwohl alles grau gsi isch, und s am Morge mol chli gnieslet het, simmer immerno troche bliebä. Müehsam isch äfach gsi, dass mä nid gwüsst het was aleggä, mit em Rägemantel z`heiss, ohni z`chalt (Wind!) oder eventuell nass… Doof!
I bi extrem früe dra gsi, will i jo nid ganz uf minere plante Route unterwägs gsi bi (ei Bärg usgloh), drum hani no wellä ä Abstächer ufä Hügel bi Heerbrugg-Balgach machä. Bim zweite Alauf ufe g`chraxlet (dr erscht isch falsche Strasse gsi), obe acho und: “Reitverbot auf allen Waldwegen“. Dankeschön! Simmer halt obe an dä Räbe dure und wieder abe. Dr Andreas het mr no vom Bronco-Saloon verzellt, enerä Beiz uf mä Riithof, mit Abindi für d`Ross, het aber gseit, er wüssi nid öb offe sig. Letscht mol bi ihne sige sie in dä Ferie gsi. I bi prompt dört acho (und ha bim Beck unterwägs äxtra nüt gholt), und natürlich isch niemer dört gsi. So schaad! Aber i ha denn dr Isard glich abunde und bi mitem Ben chli ufe deckte Balkon g`hockt und ha no zwei Farmer-Stängel g`ässe. Au ok gsi.
Z`Altstätte hei mr denn ä Beck gsuecht, und nachemä zimmlich lange Stück Hauptstroos au gfundä, und denn hei mr usserhalb nomol Siesta gmacht, g`ässe und gschloofä. Und wiedermol het mi öbber gfrogt, öbs mr guet giengi, oder öb i vom Ross gheit sig…?! Isch jo lieb, dass sich d`Lüt Sorge mache, aber igendwie närvts ä biz ;o)
Viel z`früeh, scho am 5i, simmer uf dr Steigmatt acho. Sone richtige “Touriste-Hof“, mit Hund, chline Chatze, grosse Chatze, Esel, Muetterchüe, Milchchüe und Pfaue. Und plant si au no Känguruhs! Dr Isard het ä riesigi Weid becho (iighagt mit eim Iisedroht, uf sinere Chnühöchi, so wie früener dähäi. I ha äfach ghofft, dass es hebi, und dass er nid use goht!)

5. Tag, Mittwuch, 8. September 2010 Montlingen – Gams

S`isch no trochä gsi am Morgä, ämel vo obe n`abe. Monsieur isch glich nass gsi, wahrschiinlich wills uf däm tolle Moor-/Riedbode so super bequem gsi isch zum liggä… So mit usschloofä (ha nid möge ufstoh, isch halb 7ni wordä), Ross putzä, Umpackä (nach geschtrige Problem mit dr “Foti-Täsche“) und Zmorgä n`ässe isch es nach dä 9i wordä, bis mir ändlich wäg gsi si… Drfür hani gli ä “altä“ Wanderriiter atroffä, mir mä schwarzä Karabagh usem Kaukasus… 22 und no topfit, und är au ganz ä lessige Typ… Uf jede Fall het er ä riese Freud gha an eus und mir an ihm au! I ha vo ihm no paar Tipps beträffend Wäg becho (“er goht dur ä Tunnel, oder?“) -> s`het sich als ä Metall-Röhrä usegstellt! Isch aber super gangä! Em Rhy noch ufwärts simmer super vorwärts cho, und ufem Sandwägli hei mr sogar no biz chönne galoppiere. Nachere Mittagspause (Monsieur het gmerkt, dass es am grosse grüene Züg Maischolbe dra het, und dass die no chäibe guet wäre ;-) ) het`s denn afo rägne. Zerscht nid so ärnschthaft, so dass mr no trochä durä Schlosswald cho si. Dr Schlosswald isch ganz toll, äfach sehr speziell, und bi däm Wätter au chli unheimlich… Und d`Müggli si wieder über eus här gfallä! Die paar hundert Meter durä Wald si regelrächt zur Tortur wordä! Und denn isch dr Räge cho… Zerscht hämmer nomol unter mä grossä Baum ä Pause gmacht, wo`s denn aber au dört het afo tropfä, hani mi agleggt und mr si wiiter.Für Rägewätter isch es eigentlich ä z`churzi Tagesetappe gsi.
Am 3i bini z`Sax im Volg go n`es Fruscht-Znacht ichaufä. I ha mini Bärgchetti jo scho lang gseh, und zerscht het die no richtig Respäkt iigflööst, aber dr Grabserbärg wär scho gange, und s`hätt mi extrem gluschtet…
Aber bi Näbel, und bi däm Räge isch es scho nid so optimal…
I bi also viel z`früeh bim Hof vo Dürrs cho, und nachem richtige Frogä hani dr Isard chönne bim “Übergangs-Stall“ uf d`Weid tue, und mol mini Sache afo tröchnä…
Denn het`s zur allgemeine Ufheiterig mol Schoggi geh, und ä warmi Duschi :o ) Aber wäge däm het sich s`Wätter leider au nid besseret, und so het dr Herr Dürr em Isard ä Box us Quaderballe iigrichtet, sone cooli Sach!

6. Tag, Dunnschtig, 9. September 2010 Gams – Walenstadt

Am Morgä het s`Wätter gar nüm so übel usgseh… troche und nid all zu unfründlich, aber leider ebe immerno alles nass vom Mittwuch, und uf “mim“ Bärg (däm woni drüber ha welle) isch natürlich genau no sonä blödi dicki wissi Wulche ghangä. Mit Näbel isch mr denn s`Risiko doch z`gross gsi, dass i mi dört obe denn verirr, drum hani mi entschiede dr Wäg durs Tal z`neh, wo länger isch, und i kei Charte gha ha, aber wo uf jede Fall au hät sötte passe. Schliesslich hei mr au scho 40km Etappe gmacht, und s`wär jo dr letschti Tag gsi. Will ich nur ä Kaffi zum Zmorgä ha welle, het mr d`Barbara Dürr no es “Mittags-Pick-Nick“ gmacht, so richtig mit Sandwich, Rüebli, Tomate und Öpfel! So toll! Allerdings hani no fascht Müeh gha, die Sache alli ufem Ross z`verstaue, vorallem mit dr Tomate isch`s no so schwierig gsi ;o)
Obwohl ich eigentlich gar nid ha möge ufstoh, simmer doch no vor dä 8i vom Hof wäg gloffä. I ha scho chli früe welle go, damit mr nid z`spot z`Walenstadt achöme, i ha jo no müese hei fahre. Mir hei is ä Wäg an Rhydamm gsuecht, und bis Buchs denn au gfundä, und si denn zügig vorwärts gritte, au mit es paar chline Galopps uf däm tolle Sandwäg. Scho glii simmer ind Nöchi vo Sargans cho, und hei dört eigentlich welle Pause mache, aber dr Isard het ahnschinend kei Hunger gha, oder eifach wiedermol kei Ziit zum frässe: Es Muul voll Gras abrisse und denn 20m wiiter laufe, zum negschte Muul voll! Goht jo gar nid!!! Es wär dr perfekti Platz gsi, gnueg Gras, usser em Wäg kei Möglichkeit zum drvo laufe, und nüt wo eim ablänkt. Aber ebe. Denn halt nid! Mir hei denn ufe Damm ufe gwächslet, damit mr d`Abzwiigig nid verpasse, und hei dr Rhy denn bi Sargans verloh. Er het sich zum Abschied nomol vo sinere schönschte Siite zeigt, bi strahlendem Sunneschiin, so dass i gärn no es Stück wiiter entlang gritte wär…
Dur Sargans isch rächt müehsam gsi: Mini Jungs si müed gsi, mir hei zmitzt durs Züg müese, und i bi jo uf d`Wanderwägwiiser aagwiesä gsi. Woni anä Coop anegloffä bi, mit mä super Parkplatz (Mätteli mit Bäum zum s`Ross und dr Hund abinde), hani dänkt i chauf em Isard es Kilo Haferflöckli zur Motivation, aber dä blöd Provinz-Ladä het natürlich übere Mittag zue gha! Die negschtä einehalb Stund bini denn gloffä, und mir hei eus unterwägs no es Sandwich teilt (dr Ben dr Fleischchees, ich eis Brot und dr Isard s andere). Bis uf Flums isch es ganz e schöne Wäg gsi, dr Seez entlang. Und euses Ziel nüm so wiit gsi isch, hei mr trotz Müedigkeit uf allne Siite grad durezogä. Scho am 4i simmer denn z`Walenstadt acho, und hei vonere Brugg us scho euses Gspann gseh. Ufem Bärg isch immerno ä Wulchä ghangä.
Bim nä Springbrunne het dr Ben no sini allerletschti Energie usegloh, und dr Isard het denn doch no öbbis trunke, au wenns für ihn nid ganz eifach gsi isch… D`Lüt hei ämel wieder Freud gha an mine zwei Jungs ;o)
Und denn, hei mir eus au scho ufä Heiwäg gmacht, em schöne Walesee entlang… Und i wär am liebschte bi dr negschte Usfahrt wieder use, hät dr Hänger anegstellt und wär wiitergritte…