“Projekt Rhy”

2010 bis 20??

S`Projekt Rhy isch eigentlich mi erschte “richtige“ Wanderritt.

Wemä im Baselbiet ufgwachse isch, ghört dr Rhy immer irgendwie drzue, öb z`Basel in dr Stadt, uf dr Fähri, oder nöimä z`Rhyfälde. Dä Fluss het mi immer irgendwie fasziniert, s`“Tor zu dr Wält“ mit sine grosse Frachtschiff, dä wunderschöne Brugge und dr unglaubliche Chraft vom Wasser.
Wo goht er hie, wo chunnt er här? Wie gseht`s dört us? Wär läbt dört? Mini Vorliebi für die tolle chliine Rhy-Uferwäg het mi denn uf d`Idee brocht, däm Fluss, däm Mythos, mitem Ross noche z`goh.
Zuesätzlich zieht dr Rhy si Wäg dur d`Schwiiz, und git eim ä Vorschlag, wo mä chönnt afo euses schöne Land erkundä. Und, für ä Wanderritt-“Neuling“ isch es natürlich für d`Orientierig no hilfriich, wemä weiss dass dä gross Bach immer sött linggs vo eim si, und in d`Gegärichtig sött fliesse ;o)
So hani also im Früelig 2010 s`erscht Mol 4 Täg Ziit gha, und ha mi denn mol ufe Wäg gmacht, em Rhy noch ufwärts. Die zweiti Etappe isch im Herbst 2010 drzue cho. Und au nach 10 Täg loht mi dä Fluss nid los, i ha total schöni Landschafte gseh, und extrem spannendi Lüt troffä! Und sobald i wiedermol es paar Täg frei, und kei anderi Route plant ha, gohts wiiter em Rhy noch, vilicht mol bis zur Quelle, und wär weiss, wenn mr die gseh hei, vilicht au no vo Basel Rhy-abwärts bis ans Meer…

Aber ebe, bis denn goht no viel Wasser dr Rhy ab!